Бүгін, 3 қарашада Қазақстан Республикасының Үкіметі жанындағы кәмелетке толмағандардың ісі және олардың құқықтарын қорғау жөніндегі ведомствоаралық комиссияның кезектен тыс отырысына қатыстым.

Күн тәртібінде-балалардың құқықтарын қорғау саласындағы проблемалық мәселелер, балалар психологиясының ерекшеліктері және мектеп оқушыларын онлайн режимінде ұзақ оқытуды ескере отырып, балаларға эмоционалды қолдау көрсету.

Түркістан облысындағы білім беру ұйымдарын және балаларға қатысты құқық бұзушылықтардың жай-күйін тексеру қорытындысы бойынша ҚР Білім және ішкі істер министрліктері өкілдерінің баяндамалары тыңдалды.

“І.Жансүгіров атындағы Жетісу университеті” КЕАҚ жанындағы директорлар кеңесінің отырысына қатыстым. Университеттің 3 жылға арналған даму жоспары талқыланып, бекітілді. Жаңа оқу корпусының ғимаратын салу, облыс аумағында өңірлік жоғары оқу орнының материалдық-техникалық базасын нығайту жоспарлануда.

Ағымдағы жылдың 26 қазанында “І.Жансүгіров атындағы Жетісу университеті” КЕАҚ жанындағы директорлар кеңесінің стратегиялық жоспарлау комитетінің отырысына қатыстым. Отырыс барысында университетті дамыту, алдағы жылдарға арналған жобаларды қаржыландыру мәселелері талқыланды.

 

Мектепке дейінгі және орта білім беру ұйымдарында мемлекеттік аттестаттаудың жаңа форматын түсіндіру бойынша Ұйғыр ауданының мектеп директорлары және балабақша меңгерушілерімен кездесу өткіздім. Сондай-ақ, оқушылардың қауіпсіздігі, “Педагог мәртебесі туралы” ҚРЗ нормаларын сақтау, білім беру ұйымдарында қолайлы моральдық-психологиялық климат қалыптастыру және білім беру саласындағы басқа да НҚА мәселелері қаралды.

Қарасай ауданындағы “Dana School” жекеменшік мектебіне бардым. Мектепте 1-9 сынып аралығында 217 оқушы оқиды. 19 педагог жұмыс істейді. Мектепте балаларды оқыту және тәрбиелеу үшін жағдай жасалған. Сабақтарға қатыстым, оқушылардың ашықтығы, белсенділігі және оқуға деген жоғары ынтасы көңіл қуантады.  Оқуда сәттілік, қымбатты балалар!

Қарасай ауданының тұрғындарына білім беру мәселелері бойынша жеке қабылдау өткіздім. Педагогикалық этиканы сақтау, педагогтердің құқықтарын бұзу, аудандық пәндік олимпиадалар мен ғылыми жобалар жарыстарын өткізу кезінде академиялық адалдықты сақтау, сондай-ақ педагогтерді өзіне тән емес функцияларға тарту және т.б. мәселелер қаралды.

Балқаш ауданы Бақанас ауылындағы “Бақанас аграрлық-индустриялық колледжі” МКҚК-да болдым. Аудандағы жалғыз техникалық және кәсіптік білім беру ұйымының директоры Б.Н.Өксікбаев колледж қызметімен таныстырды. Колледж 1977 жылы құрылған және өзінің қызықты тарихы бар. 1968 жылы аудан күріш өсіретін совхоз болып құрылғанда, білікті жұмысшы кадрлар жетіспеген. Осы мақсатта 420 орындық жатақханасы бар № 147 АКТУ ғимараты салынған. Колледжде дайындық 8 жұмыс мамандығы бойынша жүргізіледі: есептеу техникасы  және ақпараттық желілер (түрлері бойынша), электр жабдықтары (түрлері және салалары бойынша), автомобиль көлігіне қызмет көрсету, жөндеу және пайдалану, ауылшаруашылығын механикаландыру, тамақтандыруды үйымдастыру, шаштараз өнері, дәнекерлеу ісі (түрлері бойынша), орман шаруашылығы (түрлері бойынша). 2021-2022 оқу жылында колледжде 161 студент оқиды. Колледжде барлығы 21 педагог, 8 өндірістік оқыту шебері сабақ береді.

Колледжде жақсы материалдық-техникалық база бар, автодром, трактородром, шеберханалар, автотренажерлер және т.б. жетістіктері де бар. “ТжКБ үздік ұйымы” облыстық байқауында колледж “табысқа жету жолында” және “Инновациялық колледж” номинацияларында жеңіске жетті, басқа конкурстарда да көптеген марапаттар бар. Педагогтар мен колледж студенттерінің қарым-қатынастары жақсы әсер қалдырды! Алдағы уақытта жетістік пен сәттілік тілеймін!

Қапшағай қаласының мектеп директорлары және балабақша меңгерушілерімен кездесуде ақпараттық-түсіндіру жұмыстары аясында мемлекеттік аттестаттаудың ерекшеліктері, оқушылардың қауіпсіздігі, ҚР “Педагог мәртебесі туралы” Заңының нормаларын сақтау, білім беру ұйымдарында қолайлы моральдық-психологиялық ахуалды құру және білім беру саласындағы басқа да НҚА мәселелері талқыланды.

Мемлекеттік аттестаттаудың жаңа форматы бойынша ақпараттық-түсіндіру жұмыстары аясында Балқаш ауданының мектеп директорларымен және балабақша меңгерушілерімен кездесу нәтижелі өтті. Оқушылардың қауіпсіздігі, ҚР “Педагог мәртебесі туралы” Заңының нормаларын сақтау, білім беру ұйымдарында қолайлы моральдық-психологиялық ахуал құру және білім беру саласындағы басқа да НҚА мәселелері талқыланды.

Ағымдағы жылдың 6 қазанында Талдықорған қаласында Ұстаздар күніне арналған «Ұстаз – ұлы тұлға» атты салтанатты іс-шара өтті. Облыс әкімінің орынбасары А.М. Дандыбаев, педагогикалық еңбек ардагерлері, облыстың үздік педагогтері қатысты. Үздік педагогтер «Ы.Алтынсарин» және “ҚР Білім беру ісінің құрметті қызметкері” медальдарымен, облыс әкімінің Құрмет грамоталарымен және Алғыс хаттарымен, қомақты ақшалай сыйлықтармен марапатталған. Т.Р.Битуовамен, Н.Ж.Бирибаевамен және басқа да көптеген бұрынғы әріптестерімен кездесу күтпеген және өте жағымды болды! Барлық ұстаздарымызға денсаулық пен табыс тілейміз!